الوسم: الْنِّهَايَةِ

يا الله صباح خير .. دقت الساعة على 6 صباحا .. يا رب لك الحمد مدرستي قريبة كلها ربع ساعة واكون محشور بين الطلاب داخل الطابور ( عاد اخواننا في الهجر الحين راكبين مواترهم وهمهم الوحيد لا يطلع لهم جمل يبعثر اوراقهم ودفاتر التحضير ) .. اهي يا حزم الضامي .. الحين تلاقي الخطوط السريعة مليانة باصات وسيارات نقل خاصة للمعلمين والمعلمات الي بعيده مدارسهم .. والله عيوننا مفنجلة ومجلجلة من هالخطوط الي ما وضع لوحاتها الارشادية وتقسيم الكيلوهات غير المعلمين والمعلمات من كثر ما يسيرون عليها كل صباح .

نسينا الاذاعة .. اه يا اذاعة الصباح ( ما شغلها غير المعلمين .. وهمهم الوحيد هو هل وصل المعلم لمدرسته ام لا .. حيث انه لو ما وصل للمدرسة معناته انه كسلان ومهمل وابناءنا الطلاب راح يصيعوا بالشوارع .. وراح يمر عليهم هذا اليوم بنكد وتعس ) ماهو كلنا عارفين ان المعلم لو ما داوم راح تفضى حصته .. فمن يحرث الارض اذا غاب الحراث .

نجي نوقع للدوام .. نلقى المدير حاط خط يوحي بانتهاء التوقيع ( يالله يا عمي وقع اسفل الدفتر .. اهم شئ انك حضرت .. ماهو لو ما حضرت ما راح يكون لك توقيع .. وهذا معناته انك تبغى تضيع الاجيال الي راح يبنون الوطن بعد ما يتخرجون .. طالع يا حبيبي ثلاث مية الف عاطل يراقبون الوطن لا يضيع في الشوارع .. وش فيك انت .. الظاهر انك ما تقرأ جرايد .. او ان ما عندك وطنية .

تدخل الحصة وعرقك يصب من حرارة الجو .. لا تقولون ان مافيه مكيفات .. لا لا فيه مكيفات .. بس الطابور وانا اخوكم كان في الحوش .. والحوش مثل ما تعرفون اجواءه رهيبة خصوصا مع الصباح .. ما هو انت تربوي .. لازم تعلم الطلاب كيف يوقفون وتراقبهم .. ماهو في منهم الي بعد بكرة راح يتخرج عسكري .. واذا ما عرف يصف مع زملائه في الميدان راح يقولون ان السبب من المعلم ما علمهم .

عاد قبل لا تدخل الفصل لا تنسى تمسح بطرف شماغك على وجهك .. لا تقول لي ان عندك كلينكس .. ترى الدنيا وانا اخوك غليت .. وكل شئ غالي .. والراتب يا دوووب .. فخل الكلينكس لاهله .. استخدم شماغك في كل شئ .. او الطرحة للمعلمات .. ما هي الطرحة اصلا مصنوعة لتغطية الوجه ومسح العرق .
واحيانا يتكفلون هنود بعض محطات البنزين باعطائنا علبه مناديل صدقة اذا عبيت من عندهم بنزين .. ما فيها شئ لو استخدمته .. لكن حبة حبة وانا اخوك .. واذا احد طلبك منديل قول له روح عبي بنزين وخذ لك من عندهم .

عاد الله لا يهينك اذا وصلت المدرسة لا توقف سيارتك في مواقف الطلاب .. والله انك تتفشل فشيلة كبيرة .. جنب سيارتك بعيد شوي .. خل السيارات الفخمة للطلاب .. اما انت فاركن قرنبعك ولا احد يشوفه .. واذا شافه واحد من طلابك قل له انك انسان زاهد في الدنيا .. والسيارة وسيلة وما هي غاية .. واهم شئ يكون الانسان صاحب خلق رفيع ولا يهتم بالاشكاليات ( عاد تعرف من اهم اساسيات التعليم ان يكون عندك القدرة ان تقنع الطالب باي شئ تريده ) عاد طلابنا يصدقون .

وانتبه وانا اخوك لا تزعل اي طالب مهما كان .. عاد تعرف هم مراهقين وبعضهم صغار .. واذا غلطوا عليك وتلفضوا وسبوا وشتموا .. فانت تربوي لا تسوي شئ .. بس علم المدير والمدير راح يقول لك امسحها بوجهي .. عاد انت امسحها على طووول .. لأنه وكما تعرف ان في كل مدرسة مساحتين .. مساحة للسبورة .. ومساحة اخطأ الطلاب ..فامسح هذه الاخطأ بوجه ابو الشباب .

ويا ويلك لو تعطي الطالب حقه من الدرجات .. يا تزوده يا لا تنقص عليه .. حتى لو كان انه قليل ادب .. ما هو انت عارف لو الطالب جاب درجات متدنية معناته انت السبب .. وينك عن هذا الطالب من اول .. ليش ما اخذت بيده ولاعبتاه مرجيحا عشان يتقبل منك الدرس ويفهم .. ليش ما غيرت عقلانيته عند اكبر اطباء البلد .. ليش ما زرتاه في بيته وجلست مع ابوه .. ماهو انت عارف ان اولياء الامور مثل العسل ويقدرون المعلم ويحبونه (الظاهر انك نسيت كلامهم .. لك اللحم ولنا العظم )
خلاص يا اخي .. لا تاخذ لا لحم ولا عظم .. نجحة مع شهادة تقدير حتى لو انه ابكم .. وصدقني اول من راح يصفق لك ادارة التعليم .. ما هو السياسة اصبحت امر ضروري في كل شئ .. فخلي سياستك مثل سياسة محمود عباس مع اسرائيل .

بس لا تنسى اخي المعلم .. تكفى انا طلبتك لا تنسى .. في كل يوم وفي الفسحة بالذات .. مر على المدير .. وبس اشر له بعينك وهو راح يعرف .. راح يعطيك كومة اوراق .. تعاميم وزارة التعاميم .. اشخط عليها بقلمك .. ماهو هذه التعاميم اهم شئ .. واذا ما وقعت عليها وطبقتاها بالحرف الواحد راح يجي يوم ويحذفون بك في هجرة على حدود اليمن . فانتبه وانا اخوك .. كلها شخطت قلم .

إلا على فكرة .. اكيد انك زعلان ما عندك بطاقة معلم .. ولا يهمك اخوي .. خذ لك ورقة واكتب فيها اسمك ومعلوماتك الوظيفية .. وغلفها على شكل بطاقة .. وانتهى الموضوع .. ولا تطالب الوزارة فوق ما تتحمل .. يا اخي الوزارة في ايش والا في ايش .. اعذرها فهي مشغولة باشياء اهم من المعلم .. مشغولة بالمباني المدرسية .. ناس رايحين يجيبون سمنت .. وناس يجيبون حديد وناس يشترون اراضي .. والدنيا غالية .. وناس يكاسرون السوووق .. ماهو الوزارة اهم شئ عندها المظهر .. وكلنا يعرف ان وزارتنا غير كل وزارات العالم .. فوزارات التعليم في العالم لا دخل لها في المباني .. لان المباني من اختصاص وزارة الاسكان .. اما وزارتنا فتتدخل في كل شئ .. فاعذرهم وانا اخوك .. ما فيها شئ لو تساعدت وزارتنا مع وزارة الاسكان واخذنا الحمل عنهم كلنا اخوة .

لا تجي تقول لي انك من دفعة كذا ومعين على المستوى الثاني وانت تستحق المستوى الخامس .. ماهو كلنا عارفين هذا الشئ .. بس الله يهديك .. انت يوم قدمت على الديوان ويوم طلع اسمك في التعليم ما رموك في هجرة ووافقت .. ما كرفوك واعطوك اعمال ماهي من خصائصك ووافقت .. ما الزموك باشياء فوق طاقتك ووافقت .. ما اخروا راتبك شهرين ووافقت .. اجل راح توافق حتى على المستوى غصب عنك .. ما هو انت معطيهم الضوء الاخضر من اول .. وش فيك الان تصيح وتولول .. الله يهديك الظاهر انك نسيت انك معلم ..

انا عارف انك بتقول ان الرسول صلى الله عليه وسلم قال ( اعطوا الاجير اجره قبل ان يجف عرقه )

الله يهديك يا اخي .. هذا الحديث مضعف في وزارة التعليم .. والظاهر انهم يفكرون يلغونه من صحيح البخاري .. وش فيك انت .. مصلحة النصب والنهب تتطلب ذلك .

اها لا تجي وتقول لي انك معلم وتربي اجيال وتحضر وتكتب على السبورة وتشرح وصوتك انبح .. ماهو هذا الشئ من اللوازم التي الزمتك بها الوزارة .. وانت ما عليك الا ان تطيع يا بابا .. والراتب لا يهمك انت تربوي ولازم تزرع في نفوس الطلاب انك ما تهتم بالمادة . وش فيك انت ؟

اكيد بتجي وتقول لي ان ميزانية التعليم كبيرة .. بارد عليك واقول لك .. الله يصلحك ما قلنا لك من اول .. هذه الميزانية تروح للمباني .. يعني بدل ما كان تتكفل بها وزارة الاسكان .. وزارتنا تحملت ذلك .. ولمعلوميتك فان 80% من ميزانية التعليم تروح للمباني .. والباقي على كراسي الطلاب والكتب وتحسين مستوى شوية معلمين .. فامسك سرى حتى يجيك الدور .

اكيد بتجي وتقول ان وزيرنا ماله في التعليم وكان شغال في القطاع العسكري من اول .. باقول لك يا اخي .. انا وش قلت لك من اول ؟؟ ماهو احنا الي نعلم الطلاب في الطابور للأستعداد والوقفة والعسكرية .. ولما تخرج وزيرنا راح عسكري .. والان جاء يطبق علينا تعاليمه .. الله يهديك .. وش فيها لما يجي عسكري ويضبطنا .. ماهو الانظباط مهم وانا اخوك .

لا تزعلون من كلامي .. اني طالبكم طلبه .. يعني بسألكم سؤال وجاوبوني عليه .. الحين انت يا معلم .. لو كان عندك ثلاث فصول تدرسها .. فصلين منها طلابها اذكياء وعباقره .. والفصل الثالث كله اغبياء .. وين راح يكون جهدك وعملك .. اكيد في الفصلين العباقرة لانك ممكن تتعرض لأسئلة قوية .. فلازم تحضر الدرس مزبوط عشان تجاوب على اي سؤال .. اما الفصل الاخير فطلابه ما يساعدون .. اغبياء لا يسألون .. اكيد راح تدخل عندهم وانت طفشان وتعطيهم الحصة سريعا لانهم ما يذاكرون وغير مهتمين في الدراسة .

طيب انت لازم تعرف ان الوزارة ما عندها غير فصل واحد تدرسة في جميع انحاء المملكة .. وهذا الفصل هو فصل المعلمين .. ولكنهم وللأسف ما يذاكرون ولا يذكرون طلباتهم ولا يطالبون بحقوقهم .. فكيف تبغى منها ان تعطيك وجه .

الحين باروح انام .. بس قبل لا انام .. باقول لك شئ مهم .. حقوقك ما راح تاخذها وانت لا تحرك ساكن .