بداية غير موفقة بكل أسف والأسباب ؟

السلام عليكم ورحمة الله وبركاته

اولا يعطيكم ألف عافية يابنات وبيض الله وجيهكم على جيتكم وتعبكم من أجل راحة باقي البنات

اللي جايه من الشرقية ومن الجنوب ومن حايل ومن القصيم

ومن ضمنهم انا تركت عيالي وجيت ورجعت بنفس اليوم

لكن تعبنا للأسف ماكانت له نتيجة باللي كنت أطمح فيه واتخيله وانا بالطريق قبل اجي

العدد جدا قليل وانتم عارفين العدد جدا مهم وضروري قدام القصر

مثل ماقالو احد الضباط قبل فتره اجتمع اما القصر 200 رجل وكلهم توظفو

ليييييييش ؟؟

لان العدد له هيبه ومكانه قدام القصر ويكون لنا أثر

لكن 15 بنت جايه وش كانت النتيجه يابنات ؟؟

الطرد والاهانه والتطاول من بعض الضباط وبكل صراحة ما ألومهم تدرون ليش؟؟

لان مافيه انتظام ولا هدوء ولا اسلوب بالكلام

كل وحده تصارخ من جهه وتتكلم من جهه

حنا جايين عند الملك مو جايين نتهاوش مع الضباط والعساكر

انا فهمتكم الف مره يابنات الكل يسكت ووحده بس تتكلم عن الجميع يقولون طيب ومتى ماجاهم واحد يتكلم الكل جلس يتكلم ويسب والله عيب يابنات

مهما كان هذولا رجال وضباط ومن العيب نتطاول عليهم

انا وحده منكم وفيكم وحاسه باللي حسيتوه بالعكس حالتي اصعب منكم

انتم اقل شي ذقتو حلاة الوظيفه اما انا ولاحتى وظفوني لاتعاقد ولا اميه ولا حتى فراشه

استفدو ولو شوي من شهاداتكم بالايام اللي عشتوها سواء مديرة او بمحو اميه

لكن طريقتكم والله غلط مافيه دقة ولا اتفاق ولا هدوء ولا مشورة

تعبنا وجينا ماراح اقول على الفاضي ان شاء الله نلقى نتيجة

لكن اللي كنت اتخيله شي اكبر واحسن من كذا

يابنات اسلوب السياسه هو المطلوب بالمكان هذا مو الصراخ والكلام الغير لائق معهم

يعني بكل بساطه عادي جدا يشيلك انتي وملفك ويرمونك برا ولا احد يقولهم شي ولو كبر الموضوع لهم عذر يتكلمون راح يقولون والله سبونا واتحدونا وصرخوا علينا و … الخ

لو جيناهم بكل هدوء ووحده منا تكلمت على لسان كل البنات ومهما طردونا وماسمعوا كلامنا نقدر نثبت ونصر على شوفة الملك بكل هدوء وادب وليس تطاول على الضباط

قالو لنا روحو ابعدو نجلس بمكاننا ولانتكلم

وش بيسوون يعني

بس تجي وحده تدعي عليهم والثانيه تسبهم والثالثه تتحدى انه يمد يده عليها

هذا اسلوب همجي وليس حضاري

والله ثم والله كنا نقدر نسوي شي احلى واحسن من كذا لكن نقصنا العدد والهدوء من البنات

ادري قلوبنا كلها مقهوره ومحروقة لكن الشكوى لله نحاول مره واثنين وثلاثة حتى نلقى النتيجه

لكن بالادب والهدوء والعدد الكثير

وغير هذا لانتنظرون الا الطرد والاهانه والتعب الفاضي

وأسفه على هالكلام اللي طالع من قلب محروق على اللي شفته وذقته

واخيرا اقولكم يابنات

ضروري جدا نجتمع مره ثانيه لكن بعدد لايقل عن 100 وبإنتظام مدروس ودقيق وليس بالصراخ والتشتت

وأسال الله التوفيق لي ولكم وسامحوني ولا احد ياخذ بخاطره علي

أختكم / زهرة بريدة

---

الله يعينا ان شاء الله الامور رح تتيسر

أتمنى يااارب أنها وصلت

لكن كنت أتمنى شي غير هذا ونوصلها له شخصياً

يااارب فرجك ياكريم

ليش التحطيم هذا من بدايت العنوان ياليت يأختي العزيزة ترفعين من معنويات اخواتك الخريجات بلاش من العتاب في الوقت هذا ولا نلومهمن لما عانوه كل هالسنين الشي خارج عن ارادتهم فأرجوا ان تواسهن ولا تزيدهن ألمنا يكفي قسوة الزمن عليهن اهم شي الهدف تحقق وصلوا الخطاب للملك على المهانه والمذله التي واجهتهن لماذا الأحباط جزاك الله خيرا وعسى الله يوفق الجميع

بصراحه من حق البنات اللي سووه لاننا مظلومات 14 عام وكل الناس تعينو وتوظفو واحن مكانك سر الكلام اللي تقولين انه انقال تريه طالع خارج ارادتهم لازم يسوون كذا والله معذرون وفوق روسنا كلهم والله يوفقهم

بصراحه من حق البنات اللي سووه لاننا مظلومات 11عام وكل الناس تعينو وتوظفو واحن مكانك سر الكلام اللي تقولين انه انقال تريه طالع خارج ارادتهم لازم يسوون كذا والله معذرون وفوق روسنا كلهم والله يوفقهم

والله ماألومهم من القهرالي فيهم
اهم شيء انهم راحوو بلاسياسه بلاوجع راس
ان شاءالله ان الملك سمعهم اووصل له الخبر