أنا معلم تخصصي الكيمياء, وخبرتي سنتين فقط!, وعانيت الواقع المؤلم التالي:
السنة الآولى: حطوني في قرية تابعة لمحافظة البكيرية بالبر بين الثعابين, والعقارب, والجن, والمدير كان يقلل من هيبتي أمام الطلاب, والموجهة كان يطلب مني المثالية في العمل.
السنة الثانية: حطوني في مدينة عنيزة, وهي ديرتي, ومسقط رأسي, وعطوني 24 حصة, ومسكت الكيمياء لأول, وثاني, وثالث ثانوي, وكان عدد الطلاب اكثر من 100 طالب, وكان عدد الفصول 8 فصول, صحتي تعبت, ونفسيتي تعبت, والمدير صفر على الشمال يعني ماله حس, ولا خير في المدرسة, والوكيل قلل من هيبتي أمام الطلاب, وبغيت أتضارب معه كم مرة, والموجه يبيني أفعل المختبر, ويبيني أسوي, وأحط, وأنا على راسي ثلاث صفوف, وتوني جديد بالتعليم.
أخيراً تم إلصاق تهمة تسريب أسئلة فيني وشرحت القضية هنا: http://www.ksa-teachers.com/forums/f5/t-221106.html.
هل أصبح التعسف, والحسد, والسوء الخلق هو القوة, والرجولة؟
ليه جت الطقة على راسي؟ أنا معلم مبتدئ, وضغطوني, وأحالوني للتحقيق في النهاية؟ هل الإدارة بكامل قواها العقلية؟
أخواني تكفون فهموني وش السالفة؟ لاني أخاف أرتكب جناية بالوكيل, والمدير, والموجه, والمرشد الطلابي لأنهم بصراحة ضيعوا مستقبلي؟
هدي و شفيك ترى الدنيا ما تستاهل
اول سنه اغلب المعلمين تكون كذا فيها تعب و ارهاق
و الحمد لله انت وصلت ديرتك ياعني مايهمك شي
المهم خاف الله و ادي عملك بأمانه فقط
و صدقني بعض المدارس مافيها من ريحة التعليم شيء
مسوين مبداء القوي ياكل الضعيف
انت ماشاء الله الحين ثالث سنه
يعني المفروض بديت تفهم التعليم
اما بخصوص طلبات المشرف
بصراحه لو تشوف بعض المشرفين يوم كان مدرسين مسوو نص اللي تسوي
فانت قول ان شاء الله و ابشر و على خشمي و اجتهد قدر استطاعتك
انصحك :
1- تثقيف نفسك في قوانين التعليم و اعرف مالك و ماعليك
2- نقل الى مدرسه ثانيه و تغير اسلوبك في التعليم و تعاملك مع الطلاب و الادارة
فقد يكون هناك خلال لم تنتبه له و تنبه له المدير و الوكيل و المشرف
و اكثر من الدعاء و الاستغفار
بالتوفيق لك
بعدين لازم تقدم نقل الى مدرسة ثانيه لان باين ان ادارة مدرستك سيئة
وبالنسبة لقضيه تسريب الاسئلة لاتهتم وخلك صامد انكر على طول
والموجهه لاتهتم عطه لسان حلو وسوو اللي تقدر عليه
لايكلف الله نفسا الا وسعها ويجون البشر يحملونا فوق طاقتنا باي حق
1- تستمر في التعليم و تسلم من الاتهام الموجه لك ( و حتى لو ما سلمت منهم قدم تظلم للوزارة و انا متأكد انهم بيرجعونك معلم بسبب تخصص الكيمياء و الاحتياج ) و اذا رجعت معلم طيبتك الزايدة هذي اركنها خارج المدرسة و اذا جاك الموجهه خله يقلب وجهه و لا تكلمه و اذا كلمك وره العين الحمرا يعني بالله واحد بيحولك اداري و الى الان تخاف منه .
2- انك تتحول اداري و انا اشوف العمل الاداري افضل خصوصا ما فيه فرق كبير بالراتب (19% فرق ) و راحة العمل اريح بكثير من عمل المعلم .
توكل على الله
أنا سبق وأن حقق معي مرتين بسبب مشادات مع المدير والحمد لله لم يحصل لي أي شي
لا تتصادم مع المحققين واحرص أن يكونوا في صفك دون أن تقلل من هيبتك وثقتك .
يا رجال اللي تقدر عليه اعمله واللي ما تقدر مع السلامه لا تسوية تراك موظف حكومي ما راح احد يظرك اذا انت اديت الحد الادنى المطلوب منك
