إدارة تعليم الدوادمي أقل ما يقال عنها متخلفه في كل شيء الا حب الخشوم
عندك ظهر فيها تاخذ اللي لك واللي مو لك بعد
تشم ريحة الواسطه وانت داخل مع اول السيب المحسوبيه تنخر في جسدها المهترء اصلاً
والله ثم والله ثم والله وربي على ما أقول شهيد تراجعهم قبل الساعه 12 يقولون لك ليش جاي ووش مطلعك من مدرستك .
صار لي موقف اول ما تعينت عندهم جيت قبل 12 بحدود الساعه 9,30 المهم الا قب بوجهي واحد يوم درى أني مدرس
وش جايبك وش مطلعك من مدرستك أنت ما تدري أنك بفعلك هذا خالفت القوانين كل هذا وانا ساكت وخليته الين كمل
كلامه يوم عرفت أنه خلص وجاء بيعطيني ظهره قلت تعال يا ابو الشباب من قالك أني بكذا مخالف للقوانين وعن اي
قانون تتكلم قال وش مطلعك من مدرستك قلت مطلعتني هالورقه اللي في يدي ولو أنكم قائمين بعملكم ما أستدعى
ذلك حضوري قال مدير التعليم يقول المراجعات للمعلمين تبداء من الساعه 12 وورى
وبسرعة بديهه قلت له وديوان الخدمه المدنيه يقول دوامك يبداء من 8 ولولا الله ثم المعلمين ما حطوك هنا بعدين تحسبني
ضارب ميه وخمسين مشوار ذهاب بس عشان اطالع بوجهك والا اتهرب من دوام وش ذا التخلف ؟
قال دور لك واحد ياخذ منك الخطاب قلت بدور وبلقى لو اطلع لمدير التعليم ياخذه بنفسه وبعدين من انت ؟
يوم قلت من انت ويبلع ريقه وقال هات الخطاب ولا عاد اشوفك الا من بعد صلاة الظهر .
المهم صرت ما اراجعهم الا بعد صلاة الظهر وانطق إلى الساعه 2 يعني قبل نهاية الدوام بنص ساعه والعذر الموظف
راح يوصل اهله من المدرسة وبيجي الحين ؟؟!!!!!!!!!!!!!!!!!!!!!!!!!!!!!!!!!!!!!
موقف ثاني مع قسم التأدية مطوفين علي العلاوه السنويه لمدة ستة أشهر وكل مره يقولون بتنزل مع الشهر اللي بعده
الين رحت أنا بنفسي وميه وخمسين كيلو رايح ومثلها جاي وخلصتها .
الموقف الثالث دقيت استسفر عن موضوع الدرجه وكل موضف يحولني على موظف وأخر موظف قال تراك غثيتنا وفعلا
اضطريت اروح أخلص معاملتي يدوي وازيدكم من الشعر بيت مضيعين ملفي قعدنا ندوره ساعه .
الموقف الرابع قدمت على اقساط وجبت للبنك تعريف من المدرسة وما قبلوه المهم جيت من الرياض إلى الدوادمي عشان
أخذ تعريف ونص الموظفين في إجازه ونصهم مابعد داوم إلى الساعه 9 المهم بعد الساعه تسع أخذت التعريف وطرت
للرياض فرحان يوم رحت للبنك اليوم الثاني قالي موظف البنك التعريف هذا ما يمشي عندنا
علامة دهشه واضحه ووجه مستغرب وبيني وبينكم طقتني العبره
ليه يا ابو الشباب ما تقبلونه قال توقيع الموظف اللي وقع لك على الخطاب او التعريف مو التوقيع اللي معتمد عندنا
المهم وأخذ صوره منه وانقز لإدارة التعليم الموقره واوريه الموظف المختص قال اوووووووووووووووووووو معليش
وغير التوقيع , هذا كله وزواجي ما باقي عليه الا شهر ونص تقريباً .
الموقف الخامس صارت مشكله بيني وبين المدير المهم انا أبصم بالعشره والعشرين أن بغيتوا الحق معي المهم جت لجنة
تحقيق وحققوا مع كل المعلمين وخذوا إفاداتهم وبعد انصراف المعلمين والطلاب أجتمعنا وقالوا موقفك ضعيف وإذا كبرت
السالفه يمكن تتحول إداري ويمكن ويمكن ويمكن بيني وبينكم أنا طقني الرعب والخوف تخيلوا ثلاثه كل واحد من جهه
وكل واحد يهدد ويتوعد من جهه وقال واحد كلمه أزاحت عني الخوف قال تخير إي مدرسه ننقلك لها وتسحب الشكوى
قلت في نفسي لو الدعوه مافيها واسطات كان ماعرضوا علي هالشيء المهم قررت في جزء من الثانيه اجابه الصياح
بصياح يعني ابيعها ومثل ما تجي تجي لام أقوي قلبي .
قلت أخر حل عندي أنا أبي السالفه تكبر وأنا بنفسي بوصلها للوزاره ونفس الخطاب اللي وصلكم راح يوصل للوزير نسخه
منه يوم تغيرت النفوس وتبدل التهديد والوعيد بقدرة قادر إلى ترجي وتحولت الذئاب إلى قطط اليفه وديعه .
المهم انتهت السالفه على خير وكلٍ اخ نصيبه
تعبت وطقتني العبره على حالنا يالمعلمين وما نعانيه بعدين نكمل .
دمتمـ بخير