معلمة تحتاج المشورة

السلام عليكم ورحمة الله وبركاته
انا اعرف ان الموضوع بدري عليه للفصل الدارسي الثاني لكن حبيت استشركم
انا معلمة ادرس علوم ورياضيات لجميع المراحل من الصف الاول إلى السادس بالاضافة لمنهج قواعد خامس وسادس رفضت في البداية وعشان مايكون لي عذر في الرفض قللت المديرة نصاب الحصص اصبحت اعطي اكثر من درس في الحصة عشان الحصص قليلة والمناهج كثيرة احس اني مظلومة ادرس مواد دسمة بالاضافة للمقصف ، مااقدر اعطي مناهجي الاصلية الرياضيات والعلوم المطورة حقها مع اني مبدعة ومتميزة ……
احس اني محبطة جداً مافي مجال اني ابدع…اطور من نفسي و…و…فما الحل ابغى مشورتكم
هل فيه احد يقدر يتدخل في الجدول وتوزيع المناهج غير المديرة …..

---

بلغى المديرة من اول يوم دراسي
ولا تدخلى حصص الين يحلوا موضوعك لو يوصل لمدير التعليم

الحل بإذن الله عند المشرفه كلميها ووضحي أسبابك والمقصف لاتجبري عليه اتركيه ليس من عملك ولا فايده من شغلك فيه تعب ووجع رأس ولو ضاع ريال تدفعين من جيبك ولاحمد ولاشكر

على فكرة المديرة موظفه زيها زيك لا بيدها راتبك ولا شئ ،،،،،،،،،، يعنى انتى اشتغلى في المدرسة بما يتوافق مع قدراتك وإمكانيتك واضعة نصب عينك تطوير تلك القدرات والإمكانيات بما يتوافق مع رضاااااا الله عزوجل وليس رضااا المديرة
أجعلى رضاااااا الله هدفك ولا تفكرى بتاتا في رضاااا المديرة
( صراحة بعض المديرات ما ينعطون وجه ) ،

ما دامك مخلصة ربي بيعينك

ماشاء الله عليك منهج العلوم لحاله وجع رااااس ..
وإنتي ماشاء الله علوم ورياضيات وقواعد ومقصف الله يعطيك العافية ..

كل المديرات والمدارء يتمنوا الملعمين والمعلمات اللي زيك ..

وفي الاخير ماحد راح يسأل عنك وعن صحتك اللي راحت ..
وزين اذا عطوك درع تكريم …
دوري راحتك وإمتنعي عن التدريس الا تخصصك وخل المشرفه تتدخل والمعلمين المناهج المطورة ما يدرسون الا تخصصهم فقط ..
والا وش فايدة الدورات اللي أخذنها .. في تخصصنا ..وندرس تخصص غيرنا ..

اذا كنتي قوية ..اشد على يدك ووصلي الموضوع للمشرفة واذا مانفع مركز الاشراف وحتى يوصل للوزارة ..
والمسالة ماتحتاج كل التعاملات صارت إلكترونية .. برقية وتشرحين فيها موضوعك لمكتب الوزير ..
حتى لو خسرت..كسبتي شرف المحاولة .. مع إن الموضوع ماراح يوصل لحد كذا
أكيد راح تلاقين تهديدات في البداية من المديرة والمشرفة اذا ماكانت تخاف الله بس لاتخافين من تهديداتهم زمن التهديد ولى ..
عموما بداية الفصل الثاني او من الان عطيها خبر إن مالك علاقة الا بتخصصك ..ومالك ومال الإرهاق النفسي
والله يوفقك ..

جزاكم الله الخير وجعلها الله في ميزان حسناتكم جميعا
المشكلة ان الاشراف عندنا يقول كل شي بيد المديرة ، واصلا المفروض المديرة تشيل عني القواعد لان عدد المعلمات قليل او تطلب معلمة …انا طلبت انها تطلب معلمة عربي تعاقد تخفف عنا وقالت لا المدرسة ما تحتاج ,
واذا رضيت بالامر الواقع هل اترك مشرفة العربي تحضر لي قواعد او لا ……
احس لو نقدت سوف احبط واكره التدريس لأني بصراحة احب مهنة التدريس بشكل لا يوصف (لا تضحكون رجاء )…..
ومرة اخرى الف شكر على تفاعلكم

اسال الله ان يعينك ويهيىءلك الافيه خير تقبلى مرورى