كلمات عندنا يالسعوديين تخليك تفطس من الضحك اتحدى ما تضحك

جبت لكم اكثر الكلمات المضحكه بالسعوديه اتحدى واحد منكم يقرأها وما يضحك نبتدي.

الدلخ :

وهذاا إنسان غبي جداااا.ويرفع الضغط ….وينرفز ….

واكثر من يعااني منه المدرسين ….والاصدقاء

بحيث يفقد أهله الرجاء منه …

السلنتح :

قليل الأدب

جحلط ( بتشديد اللام ) :

وهم مرحلة متقدمة للسلنتح

مزّلب :

يعني بايعها بتراب !

مسفّح :

يعني طاير في العجّة وهو ما عنده ما عندي جدتي

يعني بالعربي الفصيح من جنب العارضة !!

الصتيمة :

وهو الشخص اللي يقول بدون فعل …!!…

ويصدق أي شيء يقال له

المسبة أو المسبوة :

هو الشخص اللي يكون مروع في صغره لدرجة أنه يصبح شبه فاقد للعقل …

الفاهي :

هذا الله يخلف مهما تقول له أو تصارخ عليه تلقاه فاتح فمه و بس

و إذا كلف عمره و تفاعل معك رد عليك و قالك : هه …

الحقنة :

هو الشخص الغثيث اللي ما يفكك لين تعطيه اللي يبيه منك

و مهما تسوي له عشان تصرفه عن الموضوع حقه ينشب في حلقك

لين يأخذ منك اللي يبيه , وهذا يفسر قول العرب : أغث من حقنة !!….

((هذا عندنا منه))

العلة :

هذا اللي ما تأخذ أنت منه أي شيء و لا عنده استعداد

انه يسمع منك مهما حاولت وهو كالمرض يعلك لين تنفقع مرارتك منه……

العربجي :

يظن معظم الناس أن العربجي هو الشخص الشديد

حق المشاكل و اللي ما يمشي إلا وهو مشخص ببنت البكار

( أسم لطريقة لبس الشماغ عند العرابجة )

و حاط مفاتيحه في سلسلة و لا بس نعال سجاديه و يسحبها تسحيب

لين جاء يمشي و دايم فاتح صدره و رازه على فوق

و كانك ولد أبوك قله شيء بس .

المرجوج :

هذا ما عمره صلح شيء صح في حياته ما يمديك تفتح فمك

إلا و طار في العجة بدون ما يفهم وش السالفة

و الارتجاج الحاصل له يختلف تماما عن مشكلة المسبة أو المسبوة

حيث يكون الارتجاج هنا نتيجة صدمة و ليس نتيجة روعة .

المطفوق :

من فصيلة المرجوج …

إلا أن مايميزه هو انه اذا مر من عند كاس أو جيك أو ابريق أو أي شيء

فيه سائل لازم يكبه ( أي يسكبه ) برجله وهو مايدري ،،

ولا تخليه يمر بجنبك وانت معك صينية فيها بيالات لأنه لازم يطقها بيده أو بكتفه ..!!

أيضا لاتخليه يصب قهوة لضيوف لأنه لازم يكب القهوة على ثوب واحد منهم..!!!!!…..

السربوت :

هذا اللي ما يخلي مكان ما يروح له

و قد كان الأولين يطلقون لقب السربوت على من يشرب الدخان

لكن الحين الله يخلف الناس تدخن بيديها و رجليها و لحد يقول لهم شيء.

الملكع :

أما هذا فيعرف حتى السكني (اي الجن )

و مقطع السمكة و ذيلها و مهما تحاول تلف و تدور معه تراه

فاهم و عارف وش تبي بالضبط فلا تتعب نفسك .

زعّيط :

مسوي نفسه يفهم في كل شيء وهو من جنب العارضة.

المصرقع : <<<<<<أمووووت أنا ع الاسم <<<<ههههههههههههاااي

هو كل شخص ما يهمه شيء و اللي يطري على باله بيسويه

لأنه ماخذ الدعوة سعة صدر و هبال …

المفلت :

هو كل شخص ما تقدر أنك تأمنه على شيء

لأنه مهوب تكانة و يتميز بكل أنواع الإهمال و التطنيش….

اللزقه:

هذا الشخص اللي على طول معك وقدامك ووراك وكل شي

وتطلع مع الباب تلقاه تركب في السياره تلقاه يطق القزازه وهاكذا.

الصديع :

اي كلمه في راسه يطلعها ولا يتنباء بأفعاله سواء كانت صح ام خطء .

الجنط :

من فصيلت الدلخ. بس انه اعلى مرتبه وتقدير عن العامه من الناس.,.

المريوح:

هذا اللي نفسه شينه . ووده يتفل في وجهك اذا كلمته

الزااااااحف.. <<< هناااا الفللله .,.,:

إنسان آخذها عرض مبسوط ويبسط من حوله سريع البديهه ولايفوته شئ..

واطلق شي فيه .. انه اخر همه العالم ومايقولون فيه .. يعني فللها وربك يحلها بمعنى الكلمه ..,

والخرس..

من نوع الكمخه والفاهي يقول إيه وهو مايدري وش السالفه..

الطبله ::

هذا عاد من كثرة الغباء مخه تحجر ,.,,.

الأرفل

..من نوع المطفوق يعني لاتقرب له ولاتخليه يقرب لشئ وخصوصا الاعمال الدقيقه لأنه ماينفع فيها..

المسلس..

هذا المسكت واللي ماتدري وش وراه تشوفه تقول جاء الاجودي وهو وراه بلاوي..

الرجه..

مصرقع مايجي بمكان الا ويرجه بصوته على غير سنع..

المهفه..

هذا كلمه توديه وكلمه تجيبه..

اللوح..

هذا لو تفهم في جدار يفهم وهو لا ..

مثل ماقال الشاعر ..,

اللوح لوح ولو كثرت عزائمه .,.

الشراره..

هذا مايجي بمكان الا والمصايب وراه يتسبب على من حوله بالقرادات..

الداج..

داج وش معناها يعني ؟؟ داج بالمال والتفكير .. يعني يطلبك الحل ..,

الفدغ أو الافدغ ……

من يحاول يستخف دمه ويبيك تضحك غصباً عنك واذا ما ضحكت من بلاهته يضحك هو الين تحس ان الشي اللي سواه من اجد مضحك ,.., <<<اهداء الى كل من يحاول انه يكون فلله وهو من جنبها ,,
اتمنى انها اعجبتكم والسلام