اسئلة عن ال19 جآوبوووو بليز

أهلن
..
انا رايحه للثانويه ال19 ان شاء الله قريب
وابغى اسئلكم عنها كم سؤال وبليز جاوبو وبلاش تطنيش 😛

اولاً كيف نظامكم بالمراييل ؟

كم ماده يدرسو سنه اولى ؟ بالترم الواحد ؟

اللبس فيه حدوود ؟ يعني ما نلبس الا الوان محدده في الجزم والبكل وكذا ؟ والا**سوار ممنوع ؟

الروج والكحل عادي ولا ممنوع كمان ؟ < يارب مو ممنوع ><"

ايوا صح .. اقدر البس صنادل ولا لازم جزمه ؟

ممم وعندكم دواليب للطالبات ؟ اذا ايوا بفلوس ولا ببلاش ؟

وبس :$

اعرف الاسئله كثيره
اللي تعرف تجاوب
وشكراً

أهلاً وسهلاً بيكي استازة.

ممتاز كدا تجينا دفعة بإزن الله تبشر بالخير، باين اهتمامك من طرحك للاستفسارات.

أعرف بنفسي أول.. انا طالبة آخر سنا ليا السنة الجية، علمي. بإزن الله اقدر اساعدك حرد على استفساراتك كل واحد في اقتباس لوحدو.

هوا في طرطشة كلام إنو النظام حيتغير السنة الجديدة لبلايز وتنانير. بس إنو اصحاب المحلات اعترضوا مشان عقدوا صفقات واشتروا مستلزمات من برا وزي كدا سارت لخبطة، والين دحين مابعرف ازا حيكون في تغيير او لا.. نستنى تعميم؟ وازا مانزل معناتو نفس ماهوا.

عموماً..

اولى ثانوي => البلوزة بيضا مقلما بمبى + OverAll بني
تانيا ثانوي => البلوزة بيضا مقلمة بني او بيج + OverAll بني
تالتا ثانوي => البلوزة بيضا مقلما أزرق +OverAll بني

مممم يا ستي هوا كل ترم حيكون 7 مواد الا سنة تالتا ثانوي حياخدوا 6 مواد.

طبعاً الدفعة رح تتقسم شعبتين، وكل شعبة ليها مواد معينة تدرسها خلال الترم الاول والترم التاني وطبعاً غير كدا في مواد مشتركة زي الرياضيات، الانجلش، الكفايات اللغوية…..إلخ

محادخل في التفاصيل كتير. بس ازا حابة تعرفي حأعمل رد بعد هادا وشرح مطول

ممم عن اللبس لاء مافي ألوان محددة.. الا طبعاً الالوان الفسفورية هادي تفقع العيون وغير مريحة طبياً فهادي الافضل انك تتنجبيها.

الا**سوارات لاء غير ممنوعة لكن كترتها حتزعج بعض الابلات. حاولي تكتفي اكتر شي بساعة معصم شيك وعملية

ممممم خايفا افتي دحين… بس الروج طبعاً ممنوع، بالزات الارواج دي بالالوان الغجرية الله يهديهم بعضهم ماعرف متى تحصل الوقت تصحالك الفجرية وتعمل لوحة فنية على وشها.

عموماً مرطبات الشفايف او الارواج بالالوان الطبيعية محاتكون ممنوعة بإزن الله. والكحل برضو بس اهم حاجا لا تكتري وحبذاً يكون اسود وخفيف.

الصنادل مو ممنوعة البعض بيلبسها… لكن نصيحة مني خليكي عملية والبسي جزمة سبورت الله يكرمك.. حتفيدك في المشي وتريحك لأنو احتمال السنة يكون نظام قاعات

موجودة الدواليب في الفصول وخارج الفصول، بس اولاً اعدادها محدودة بحيث كل 3 بنات ممكن يتشاركوا في وحدة.

غير كدا زي ماقلتلك احتمال النظام يتغير السنة هادي.. فحتكون دواليب مخصصة لكل قاعة يعني لكل مادة

اهلاً وسهلاً ،طابت أوقاتكِ.